سەنبى كۇنى ورال شاھارىنداعى تاۋەلسىزدىك الاڭىندا "ءداستۇر" اتتى مادەني- كوپشىلىك شارا ءوتتى. ق ر پرەزيدەنتى نۇرسۇلتان نازاربايەۆتىڭ "بولاشاققا باعدار: رۋحاني جاڭعىرۋ" اتتى ماقالاسىندا "ىقىلىم زاماننان ارقاۋى ۇزىلمەگەن ۇلتتىق ءسالت-داستۇرىمىزدى الداعى وركەندەۋدىڭ بەرىك ءدىڭى ەتىپ الىپ، بولاشاققا سەنىممەن بەت الىپ، العا نىق قادام باسۋ" قاجەتتىگى تۋرالى ايتقان بولاتىن. وسى جوبا اياسىندا جاس ۇرپاقتىڭ ساناسىنا پاتريوتتىق سەزىم ۇيالاتىپ، ۇلتتىق ءسالت-داستۇرىمىزدى ۇلىقتاۋ ماقساتىندا ۇيىمداستىرىلعان شاراعا حالىق كوپ جينالدى. مادەني شاراعا وبلىس اكىمىنىڭ ءبىرىنشى ورىنباسارى ارمان وتەعۇلوۆ ارنايى كەلدى.
- بۇگىنگى شارا - ەلباسىمىزدىڭ "رۋحاني جاڭعىرۋ: بولاشاققا باعدار" باعدارلاماسىنىڭ اياسىندا ءوتىپ جاتقان ەتنوستىق شارالاردىڭ ءبىرى. اتا-بابامىزدان مۇرا بولعان يگى ءداستۇرىمىزدى جاستاردىڭ ساناسىنا ءسىڭىرۋدى ماقسات تۇتادى. ءوسىپ كەلە جاتقان جاس ۇرپاق ۇلتتىق قۇندىلىقتارىمىز بەن ءسالت-داستۇرىمىزدى زامان تالابىنا ساي قولدانىپ، ۇرپاقتان-ۇرپاققا جەتكىزسە دەيمىز، -دەپ ءسوزىن ساباقتاعان ارمان كارىم ۇلى ۇلتتىق قۇندىلىقتارىمىزدى ناسيحاتتايتىن مۇنداي مەرەكەنىڭ الداعى ۋاقىتتا دا تۇراقتى تۇردە ءوتىپ تۇراتىنىنا سەنىم ءبىلدىردى.
ءان مەن جىر توگىلىپ، ۇلتتىق ءسالت-داستۇرىمىز كورىنىس تاپقان شارادا ءوڭىرىمىزدىڭ ورتا، جوعارى وقۋ ورىندارىنىڭ ستۋدەنتتەرى مەن وقىتۋشىلارى بەلسەندىلىك تانىتتى. تاۋەلسىزدىك الاڭىندا ءار اۋدان مەن ورال قالاسىنىڭ تۇرعىندارى اق شاڭقان كيىز ءۇي تىگىپ، ۇلتتىق ءسالت-داستۇر بويىنشا كورىنىس كورسەتىپ، كەلگەن قوناقتارعا قازاقتىڭ ادەت-عۇرىپمەن قوناقجايلىلىق تانىتتى. مەرەكەدە ۇلتتىق قولونەر كورمەسى ۇيىمداستىرىلىپ، ۇلتتىق ويىندار وينالدى. قادىر مىرزا ءالي ەسكەرتكىشىنىڭ ماڭىندا اق جايىقتىڭ اق شاعالاسى اتانعان اقۇشتاپ باقتىگەرەيەۆا باستاعان ءوڭىرىمىزدىڭ اقىن-جازۋشىلارى جاستارمەن جۇزدەسىپ، تاعىلىمدى اڭگىمەلەر ايتتى.
ۇلتتىق ادەت-عۇرىپ، ءسالت-داستۇرىمىزدى جۇرتشىلىق نازارىنا ۇسىنعان جاراستى شارا قالالىق، وبلىستىق ونەر ۇجىمدارىنىڭ كونسەرتىنە ۇلاستى.
گۇلجامال جولدىعالي
